Ekekekeke... semalam siorang pigi sana Hotel Le Meridien. Tujuan, teda len teda bukan, pigi jumpa si Lotter di bilik dia (ELVIANA @ YAN... relax ko...). Sebenarnya si Lotter ni lama uda teringin makan makanan kampung. Fevret dia tu PINASAKAN! Sia tlepon kawan sia, minta tulung antar. tapi sia nda kasi tau dia yang mo pi antar kasi si Lotter. Oh ya... dia (Lotter) ada minta bawa Lihing lai... ahaks... bergeraklah kami around 7.30pm gitu... sampai di hotel at about 8.30 gitu. trus naik... wah... sampai jak di bilik dia, trus kami offer tu Pinasakan sama Lihing... kawan sia nda berkata apa-apa... sia pun nda tau kenapa... Sambil si Lotter makan, kami crita-critalah.. banyak juga crita... sia kira mo ambil pic time dia makan, tapi, jan kasi malu dia bilang. ada juga urang cakap yang nda buli ambil pic time urang makan... btul kah? adeh... Banyak kunu crita kami, dari time dia di membakut sampailah dia di sana kl... frenly ni urang... Trus tiba² fon si lotter bunyi. Oh, si Marsha Call.. tidak lama si Marsha datang... dia akculi mo p prektis sama si lotter lagu untuk derang perform ni malam (30hb Ogos), tapi end-up crita sama kamirang... adeh...

Sedar tidak sedar, sia tinguk jam mo pukul 12 uda... tapi rasa macam baru becerita. Sia pun ngantuk uda... tapi derang si Lotter masi lai siuk becerita... adik si Lotter, si Luther pun ada... kami pun baliklah. Sepanjang perjalanan, baru kawan sia bersuara! Sepanjang dalam bilik si Lotter dia tidak begitu banyak cakap. Adeh... bila dalam krita... sampai nda kasi chan sia becakap... topic dia... Lotter tidak lupa diri, Marsha makin cantik...? adakah? Tapi sepanjang perjalanan pulang, sia berpikir juga. Berapa banyak artis yang uda pemes dan popular, bila nampak makanan kampung, bleh trus teruja? Macam si Lotter, bila dia nampak dalam bekas tu ada Pinasakan, trus dia cakap "Fevret Sia"!. Buli dia makan ja pakai tangan. Plain Ikan, ndada nasi... Lotter sia SALUTE Ko!!!!


Ni pic ni bukan semalam... tapi pic si Lotter time di Beaufort!!! Yeah!!!

Apapun... sia mo ucapkan terima kasi sama si lotter kerana sanggup menerima "buah tangan" kami yang nda seberapa... ahaks... Pesan si Lotter sama sia, "Mark, kalau sia balik Sabah, sia kasi tau ko... tapi ada syarat! Misti ada Pinasakan sama Lihing!" On ja kalau ko bah Lotter!!! Ahaks..

Bah ni ja update sia ni ari.. Oh yah... Hepi Merdeka!!!! Merdeka, Merdeka, Merdeka!!!

Lama uda tidak tulis ni blog ni. Telampau sibuk sampai ada ketika sia lupa yang sia ada blog... wakakakaka... Apa kabar smua urang. banyak juga sia nampak sono tu yang kutak teriak sia menyuruh sia mengupdate ni blog... minta mahap banyak-banyak... blum juga ada story gila yang sia mo kasi masuk sini... wekekeke. Banyak yang happen sepanjang kamirang pinya trip untuk buat tu Sabah Fantasia Tour, nanti sia bagitau kamurang lah...

Oh yah... kepada peminat lagu-lagu kadus, sukunglah Topbinai sia si USAL John Gavis, yang pemes dengan lagu Au Kito Noh Miuhang, dimana dia akan buat Mini Show di Pusakag Cafe, Donggongon. Sia ada juga dijemput, tapi bergantunglah. Kalau sia datang, sia akan datang atas nama KaDuS Entertainment, and alangkah bestnya kalau smua admin and member dapat datang. Nga tinguklah... Untuk makluman lanjut mengenai mini Show Usal ini, Layari http://kadusmusic.tambalut.com.

Slalu sia kana tanya, Marc, macam na sumandak ko skrg? ahaks... welll, dia sihat walafiat. tetap dengan kejajalan dia. tapi kadang-kadang nda pandai dingar cakap nie... tapi nda pa pa jugak lah...

Nantilah sambung... adei... tq kerana melawat blog sia yang taraat nie... (rasa macam mo cat balik lai kaler ni blog nie..)