KaDuSViLLe

Kopivosian kumaa toinsanan tutumombuhui, kouvang om nogi ih toimo imo do mooi omboh om nogi mooi pambasa sinuatan id suang blog ku diti. Tantu do nokotigok kou ngavii tu susuvai kozo ih sinuat ku do baino. Otopot nopo nga, aiso ih do pisuvasan mantad ih sinuat ku dii poguhu poh, nga baino kuminam zou do monuat id boos tokou sondii, Kadazan. Kumaa dii kalati iti sinuatan ku monongkotohuod zou do au gina tu nakataak ko timpu do mambasa iti. Siou nung kivaa ih au notunud iti boos ku, tu izou nopo nga kakal poh do balajar moboos om munuat id suang do boos Kadazan. Iti sinuatan nopo nga mantad pomusahavan zou do sondii om okon ko mantad suvai tuhun, dadii ahansan zou do au kou ngavii otogod songian kabasa kio...

Nonggo tosusa nung balajar do moboos? Kadazan toi koh Dusun? Montok kopoihan diozu, kogumuan tambahut ku mantad id uvang Tambunan, Ranau, Keningau, Kota Belud, Kuala Penyu om au nogii ohivaan id uvang Penampang om Papar. Kogunuan dotiho moboos id boos doh Dusun. Songian nopo uoton ku, nonggo iso tosusa, kogumuan dotiho do sumimba, "Osusa Kopiyo Balajar Boros Do Kadazan! Ogumu ih Z!" kaa dotiho. Uoton ku poh vagu ih tambahutku do Kadazan, "Doi, Osusa moboos Dusun. Koihit diha. Ogumu vagu do R". Dadii nonggo iso tosusa? Izou do pomusahavan, nga duduvo boos (Kadazan om Dusun) aiso ih kosusaan do balajar nung kihizab tokou noh do minsingiho! Montok dogo, Boos do Kadazan toi ko Dusun au ih osodu pisuvasan dau. Taako ku diazu do "contoh" kaa do malazu. (Onu kaa do boos do tokou "contoh"? au zou insan koongou? Ekekekeke)
-------------------------------
Boos (KDZ) = Boros (DSN) => Cakap/Bahasa
Lahan (KDZ) = Ralan (DSN) => Jalan/Cara
Koposizon (KDZ) = Koposion (DSN) => Kehidupan

Guminawo (DSN) = Guminavo (KDZ) => Mencintai
Momuhondom (DSN) = Momuondom (KDZ) => Mengingati
Sala' (DSN) - Hasa' (KDZ) => Salah

Nung intangan tokou do koitahangan id savat, au ih songkuo osudu iti boos do Kadazan om Dusun koni. Dadii, otopot nopo, nung montok dogo, au ih osusa balajar iti boos do Kadazan toi ko Dusun. Au zou poh pandai moguhud boboson id Dusun, hobi poh do moboos. Ingkaa nogi doo boos Kadazan. Topot nopo nga, kakal zou poh balajar iti boos do Kadazan mantad zi-aki ku, om nogi tuhun kampung ih nongohoing noh... Kada kohodong kio. Somunu do mihohongod songian zou do moboos Kadazan. Ahaks..

Iti nopo sinuatan ku baino nga kokomoi noh do boos do Kadazandusun. Nokuo tu kogumuan komuhakan tokou au dii koiho do moboos id boos do Kadazandusun? Isai dati pahasaon nung insan tadau opunso iti boos tokou? Kivaa tuhun minoboos do dasom do atus toun, atagak dati iti boos tokou. Katapi, mantad ih pomusahavan ku, au dati koikot do atus toun om atagak nodi iti boos do Kadazandusun nung aiso kalaja do manampasi. Aiso nodii tuhun, hohobi poh ih monongodu om manangaki tokou, do koiho iti boos Kadazandusun. Okon ko nopo do boos nga ih nogi koubasanan om tungkus tokou. Onu ih lahan do tavasi kozo do momogompi iti boos tokou?

Tumanud do pomusahavan ku, kivaa pipio laan do buli gunoon do manampasi ngavii boos do Kadazandusun.
Koiso
- Balajar moboos mantad daamin. Mokituduk mantad mohoing tokou. (Au nopo popoiho ih mohoing, kokoton do tohingo dotiho)
Koduvo
- Nung kasaha do moboos, kada koikum do muot ih kouvang toi ko topbinai ngavii.(Tapi nung ih kouvang au nogi pandai moboos, toi ko "dua kali lima" tapapo makai solipar jipun)
Kotohu
- Podulion ngavii ih tuhun do popoiak toi koh mimboos do alaat songian nopo do nabati' iti boos nu. (Suuon dotiho do moboos id boos do Ingris toi koh jipun)
Kaapat
- Angatai ngavi ih tambahut do moboos id kadazandusun.(Au nopo tumanud ngavii tambahut nu, suuon do mooi tuubung dukutor. Sumakit datii ino.)
Kohimo
- Toimo imo do mokinongou radio Kadazan toi koh Dusun nung kivaa noh do timpu. (Nga okon koh do mokinongou kopoihan suang hamin toi ko hoogo do gata nopo)
Koonom
- Mambasa do kalatas abal id kadazan toi dusun. (Okon koh momohi kalatas abal, mooi nopo intong result 4D...)
Kotuu
- Om susuvai poh..

Ogumu poh dati laan do manampasi om momogompi iti boos tokou nga au zou koimat do monuat tuh oluahan zou noh do tuhu ti. Tia diha ku nga koihit nodi, tu songian monuat, basaon ku tulus. Nung kivaa pomusahavan diozu kokomoi iti, kavasa kou do monuat id "Comment" toi ko Email ku id= markiekadus@yahoo.com. Kada hivai, nung papatod ko nopo dogo doh emel nga suaton noh isai ko... mana tau kahasa vagu do tuhun. Songkosuvasan dati tondoson ku. ekekekeke...
Bah ih iti noh dati gisom sinuatan ku. Ahansan zou do au kou kokuazai songian kabasa iti blog ku. Kada doh mimang luo' ino tuhu nu sabab oihaan ku do "lintang-pukang" iti blog ku baino. Tudukan zou noh nung kivaa kinahasaan ku do monuat kio... Bye... Kotouhuadan... Doino kono...


KaDuS Bilang:
Wakakakaka... apa sia tulis ni... sumtime, sia sindri pun tidak magarti... ahaks... sia harap kamu faham lah... kalau nda faham pun, pura-pura paham pun buli lah... wakakakakaa